Greining á trúar- og siðferðisstefjum:
Kvikmyndin byrjar á tilvitnuninni „Elska skalt þú náungann“ með stórum stöfum þvert yfir tjaldið. En í stað þess að vísa beint í Biblíuna þar sem þessi orð eru víða að finna, er aðeins sagt undir tilvitnuninni: „Heimild gleymd.“ Verður það að teljast vel við hæfi í ljósi þess að allur kristilegur kærleikur virðist fyrir löngu horfinn af sögusviðinu og meira að segja presturinn reynist ótíndur vopnasali sem siglir undir fölsku flaggi.
Í upphafi kvikmyndarinnar reynir einn hershöfðingi að komast hjá því að borga vopnasala fyrir nýjustu sendinguna og sakar hann um minnisleysi með þeim orðum að slíkt geti reitt Guð til reiði. Vopnasalinn svarar þá því til að Guð sé á himninum en sjálfur sé hann hér og myrðir síðan hershöfðingjann.
Einnig kemur norn aðeins við sögu sem segist alvitur en reynist samt skeikul.
