DEUS EX CINEMA trúarstef í kvikmyndum

Þessi frábæra sakamálamynd er ein af þeim allra bestu sem Ítalir hafa sent frá sér enda hefur hún til að bera flest af því besta sem einkennt hefur handbragð þeirra. Glæsileg kvikmyndatakan með frumlegum sjónarhornum og viðeigandi litanotkun ber vott um listræna formskynjun auk þess sem tónlistin hæfir vel bölsýnni persónusköpuninni.

Leikstjórinn Fernando Di Leo byrjaði feril sinn sem handritshöfundur að spaghettí-vestrum fyrir kvikmyndagerðarmenn á borð við Sergio Leone, Lucio Fulci, Duccio Tessari og Florestano Vancini. Fljótlega gat hann sér þó orðs fyrir leikstjórn hrottafenginna sakamálamynda um lánlausa glæpamenn en Caliber Nine er þar gott dæmi. Di Leo reyndist samt mistækur þegar á leið og verða sumar af síðustu kvikmyndum hans að teljast hreinræktaðir kalkúnar.

Leikararnir eru margir fínir. Gastone Moschin er sérstaklega góður í hlutverki glæpamannsins Ugo Piazza sem félagar hans gruna um græsku. Barbara Bouchet stendur líka vel fyrir sínu en hún leikur vinkonu Piazzas sem vinnur sem fatafella í næturklúbbi. Mario Adorf hefur sjaldan verið betri sem hrottafengni handrukkarinn Rocco Musco og er hreint út sagt ógnvekjandi í hlutverki sínu. Frank Wolff leikur skapvondan lögreglustjóra af mikilli innlifun og Luigi Pistilli er fínn í hlutverki aðstoðarmannsins sem blöskrar framferði hans.