Greining á trúar- og siðferðisstefjum:
Kvikmyndin Massacre Time er ósköp hefðbundinn spaghettí-vestri en stendur þó vel fyrir sínu. Reyndar hefur hann einnig verið gefinn út undir titlunum Colt Concert, The Brute and the Beast og Django the Hunter, en á Ítalíu nefnist hann Le colt cantarono a morte e tu … tempo di massacro. Eins og í svo mörgum spaghettí-vestrum er hefndin meginþemað, en í þessu tilfelli áttar aðalsöguhetjan sig þó að lokum á því, að hlutirnir eru ekki eins einfaldir og hann hafði lengst af haldið. Ekki er samt hægt að segja að mannleg samskipti nái mikilli dýpt enda tjá menn sig mest með byssunum sínum. Hvað trúarþáttinn varðar má benda á borðbæn vinarfjölskyldunnar áður en hún verður fyrir barðinu á byssumönnum Scott-feðganna.
